Endringar i reglane for bruk av restlysforsterkande og termiske siktemiddel ved jakt
Landbruks- og matdepartementet fastsette 26.06.2026 endringar i jaktutøvingsforskrifta,sjå www.lovdata.no. Dette vart gjort på bakgrunn av behov for tilpassingar i forskriftsverket i samband med at den nye Viltressurslova skulle tre i kraft 01.07.2026. I den nye viltressurslova er det lagt inn forbod mot bruk av restlysforsterkande og termiske siktemiddel ved jakt (§ 26).
Kommunal forskriftsheimel
Ei av endringane i jaktutøvingsforskrifta er at kommunane no har fått heimel til å fastsetje lokale forskrifter. Dette opnar for å vidareføre bruken av restlysforsterkande og termiske siktemiddel ved jakt etter hjort i ope terreng (§ 29a, fjerde ledd).
Bakgrunn og utfordringar i Sauda
Sauda kommune har over tid hatt ein stor hjortebestand. Hjorten er ein viktig ressurs, men den høge bestanden fører også til utfordringar. Dette gjeld særleg beiteskader på innmark og skog, høg risiko for viltpåkøyrsler, og vanskar med å nå bestandsmåla i den kommunale hjorteviltforvaltninga. Kommunen vurderer at restlysforsterkande og termiske siktemiddel bidreg til ei meir effektiv og trygg jakt. Dette er særleg viktig i situasjonar der ordinære jaktformer ikkje gir stort nok uttak. Slike siktemiddel har vore lovlege fram til no, og bruken har vorte svært utbreidd blant hjortejegerane etter kvart som teknologien har vorte billegare og meir tilgjengeleg.
Lokal forskrift for jaktstarten 2026
Departementet har ikkje fastsett nokon overgangsordningar for dei nye reglane. For at termiske og restlysforsterkande siktemiddel framleis skal vere lovlege under hjortejakta hausten 2026, har Sauda kommune v. administrasjonen utarbeidd eit framlegg til ei lokal forskrift. Det er forslaget til ny lokal forskrift som vert sendt på høyring og som det er høve til å kome med merknader til. Høyringsframlegget ligg vedlagt. Teksten i høyringsframlegget byggjer direkte på dei same formuleringane som departementet har brukt i jaktutøvingsforskrifta.
Les Forslag til ny forskrift (DOCX, 22 kB).
Kort høyringsfrist
Forskriftsutkastet er ikkje handsama politisk. Men det vert sendt ut på høyring av administrasjonen i samråd kommunalsjef for næring, samfunn og kultur. Saka vert handsama politisk etter at høyringsinnspela har kome inn. Fristen for å gi uttale til framlegget er 13. august 2026. Dette er ein noko kortare frist enn vanleg, men det er nødvendig for at kommunen skal rekkje å gjere eit gyldig politisk vedtak i løpet av september.
Har du innspel?
Frist for å komme med innspel til forslag til forskrift om bruk av restlysforsterkande og termiske siktemiddel ved hjortejakt er 13.08.2026.
Høyringsinnspel skal vere skriftlege og sendast til Sauda kommune, til:
Me ber om at det i høyringsinnspelet går klart fram kva del av forskriftsgrunnlaget det vert kommentert på. Me ber om at du oppgir fullt namn, kontaktinformasjon og saksnummeret 26/1234 ved innsending av innspel.
Vidare prosess
Etter at høyringsfristen er over, vil kommunen:
- Vurdere og samanstille høyringsinnspela
- Føreta eventuelle justeringar av høyringsforslaget
- Leggje saka fram til politisk handsamaing hausten 2026.
Målet er å fastsetje lokal forskrift om bruk av termiske siktemiddel ved jakt på hjort i Sauda
kommune innan 1.september 2026, slik at forskrifta er klar til hjortejakta 2026.
Spørsmål?
Ta kontakt med Elin Tjordal på eining Landbruk: